यस्तो छ तेक्वान्दो खेलाडी निशा रावलको ओलम्पिक तयारी

श्रावण २७, २०७३- तेक्वान्दो खेलाडी निशा रावलले रियो ओलम्पिकमा प्रतिस्पर्धा गर्न ब्राजिलतर्फ लाग्नुअघि स्वदेशमा अन्तिम प्रशिक्षण बिहीबार सकेकी छन् ।

उनले लगनखेलस्थित सैनिक शारीरिक तथा खेलकुद तालिम केन्द्रमा प्रशिक्षण गरेकी हुन् । उनी एक महिनायता बिहान र दिउँसो गरी दैनिक ६ घन्टा प्रशिक्षणमा व्यस्त हुन्थिन् । उनलाई ओलम्पियन संगीना वैद्यले प्रशिक्षण दिँदै आएकी छिन् ।

छनोटमा असफल भएपनि उनले ‘वाइल्ड कार्ड’मार्फत् ओलम्पिक खेल्ने अवसर पाएकी हुन् । उनले हेभिवेट (६७ केजीमाथि) को स्पर्धामा प्रतिस्पर्धा गर्नेछिन् ।

यसमा १६ खेलाडी सहभागी भएको र त्यसमध्ये वाइल्ड कार्ड पाउने निशा एक्ली रहेको प्रशिक्ष वैद्यले बताइन् । यी गुरु-चेली शुक्रबार ब्राजिल प्रस्थान गर्नेछन् । उनीहरुलाई राष्ट्रिय खेलाडीहरुले लगनखेलमा बिहीबार बिदाई गरे ।